Վենեսուելայի դեմ այս հարձակումը շարունակությունն է Միացյալ Նահանգների երկարամյա միջամտողական քաղաքականության
- Redacción NOR SEVAN
- hace 15 minutos
- 2 Min. de lectura
Հայաստանի կոմունիստական կուսակցության հայտարարությունը:
Հայաստանի կոմունիստական կուսակցությունը խստորեն դատապարտում է Միացյալ Նահանգների կողմից Վենեսուելայի դեմ իրականացված ռազմական գործողությունները, որոնք 2026 թվականի հունվարի 3-ին վերածվեցին բացահայտ զինված հարձակման ինքնիշխան պետության վրա։
ԱՄՆ ռազմաօդային ուժերի հարվածները Կարակասին և երկրի այլ ռազմավարական կենտրոններին ուղեկցվել են խաղաղ բնակչության շրջանում զոհերով։ Թիրախավորվել են պետական կառավարման և քաղաքացիական ենթակառուցվածքների օբյեկտներ, ինչը վկայում է գործողությունների իրական նպատակի մասին՝ վախի մթնոլորտ ստեղծել, ապակայունացնել երկիրը և բռնությամբ պարտադրել արտաքին քաղաքական կամքը։
Տեղի ունեցածը միջազգային իրավունքի և ՄԱԿ-ի կանոնադրության կոպիտ խախտում է։ Սա ոչ թե առանձին ռազմական միջադեպ է, այլ նպատակաուղղված քաղաքական գործողություն՝ ուղղված օրինական ընտրված իշխանության տապալմանը և Վենեսուելայում կախյալ վարչակարգի հաստատմանը։
Վենեսուելայի դեմ այս հարձակումը շարունակությունն է Միացյալ Նահանգների երկարամյա միջամտողական քաղաքականության, որի հետևանքով տասնամյակների ընթացքում տարբեր տարածաշրջաններում խաթարվել են պետությունների ինքնիշխանությունը, քայքայվել հասարակություններ և զոհվել միլիոնավոր մարդիկ։ «Անվտանգության» և «ժողովրդավարության» կարգախոսների ներքո իրականացված պատերազմները իրականում ծառայել են գլոբալ կապիտալի և ռազմարդյունաբերական համալիրի շահերին։
Վենեսուելան քառորդ դար շարունակ դիմակայել է տնտեսական ճնշումներին, պատժամիջոցներին և արտաքին քաղաքական շանտաժին՝ պաշտպանելով ինքնուրույն զարգացման իր ընտրությունը։ Այդ դիմադրությունը դարձել է ոչ միայն ազգային ինքնապաշտպանություն, այլև օրինակ այն ժողովուրդների համար, որոնք չեն ցանկանում հաշտվել արտաքին թելադրանքի հետ։
🇦🇲Խորին մտահոգություն է առաջացնում Վենեսուելայի օրինական ընտրված նախագահի և նրա ընտանիքի նկատմամբ կիրառված բռնությունը։ Սա վտանգավոր նախադեպ է, որը խարխլում է միջազգային հարաբերությունների հիմնարար սկզբունքները և բացում ճանապարհ նոր, առավել վտանգավոր էսկալացիաների համար։
Հայաստանի կոմունիստական կուսակցությունը իր լիակատար համերաշխությունն է հայտնում Վենեսուելայի ժողովրդին և դատապարտում է ցանկացած փորձ՝ ուժի միջոցով խախտելու պետությունների ինքնիշխանությունն ու ժողովուրդների կամարտահայտությունը։
Մենք կոչ ենք անում միջազգային հանրությանը, մասնավորապես՝ այն երկրներին և քաղաքական ուժերին, որոնք հանդես են գալիս բազմաբևեռ աշխարհի և միջազգային իրավունքի պաշտպանության օգտին, հանդես գալ համատեղ և հետևողական դիրքորոշմամբ՝ ընդդեմ ռազմական ագրեսիայի և միջամտության քաղաքականության։
Այսօր առավել քան ակնհայտ է, որ իմպերիալիզմը շարունակում է մնալ համաշխարհային անկայունության և պատերազմի հիմնական աղբյուրը։ Միայն ժողովուրդների համախմբված պայքարը՝ հանուն սոցիալական արդարության, խաղաղության և իրական ժողովրդավարության, կարող է հակազդել այդ վտանգավոր միտումներին։
Հայաստանի կոմունիստական կուսակցություն
Comentarios