"Կապիտալիզմն ավերեց նաև խորհրդային դպրոցը, որը լավագույնն էր աշխարհում"

ՀԿԿ Կենտկոմի առաջին քարտուղար Երջանիկ Ղազարյանի ուղերձը գիտելիքի և դպրության օրվա կապակցությամբ:

Հարգելի մանկավարժներ, աշակերտներ, ծնողներ և ուսանողներ, շնորհավորում եմ ձեզ գիտելիքի և դպրության օրվա, նոր ուսումնական տարվա կապակցությամբ։ Ցանկանում եմ ձեզ հաջողություններ այս երախտապարտ գործում։

Պետության ճակատագիրը գտնվում է դպրոցների՝ մանկավարժների ձեռքում։ Իզուր չէ, որ սովետական տարիներին մանկավարժի աշխատանքն ամենահարգիներից մեկն էր, իսկ աշակերտներն ու ուսանողները մշտապես գտնվում էին պետության հոգածության և ուշադրության կենտրոնում։ Ի շնորհիվ նաև սովետական դպրոցի ու մանկավարժների, հայ ժողովուրդն ունեցավ վիթխարի ձեռքբերումներ, որոնցով հպարտանում ենք առ այսօր։

Գիտելիքը միշտ եղել և շարունակում է մնալ ամենակարևոր ռեսուրսներից մեկը։ Պատահական չէ, որ դարերի ընթացքում, միայն «բարձր» խավի հատուկենտ ներկայացուցիչներին էր հնարավորություն տրված հաղորդակից լինել նախնյաց գրական ժառանգությանը։ Չկար կրթություն բոլորի համար, որովհետև անկիրթ մարդկանց ավելի հեշտ է կառավարել։ Հոկտեմբերյան Սոցիալիստական Մեծ Հեղափոխության հաղթանակով հնարավոր եղավ վերջ դնել դասակարգային այդ անհավասարությանը, և կրթությունը դարձավ հանրամատչելի, անվճար, իսկ միջնակարգ կրթությունը պարտադիր բոլորի համար։

Վայրի կապիտալիզմն ավերեց նաև խորհրդային դպրոցը, որը լավագույնն էր աշխարհում։ Տեղի ունեցավ արժեհամակարգերի կտրուկ փոփոխություն և կրթված մարդիկ հայտնվեցին լուսանցքում։

Գիտելիքի և դպրության օրվա կապակցությամբ, ես մեկ անգամ ևս շնորհավորում եմ մեր բոլոր մանկավարժներին, աշակերտներին և ուսանողներին ու կոչ անում նրանց՝ կանգնեք մեր կողքը, որպեսզի միասին կրկին պայքարենք ու վերականգնենք մեր դպրոցի որակը, բոլորի համար՝ առանց բացառության, կրթությունը դարձնենք անվճար և հասանելի։