Գործ ունենք կենսական կարևորության խնդրի հետ

Ի՞նչ են անում Հայաստանում ԱՄՆ-ի կողմից ֆինանսավորվող լաբորատորիաները:

Մարտին Հուրիխանյան, "ԻՐԱՏԵՍ"

31.03.2022

Ռուսաստանի կողմից իրականացվող ռազմական հատուկ օպերացիայի ընթացքում տագնապահարույց բացահայտումներ արվեցին ՈՒկրաինայում ամերիկյան ֆինանսավորմամբ ու վերահսկմամբ գործող կենսաբանական լաբորատորիաների գոյության ու գործունեության մասին:

Ըստ գաղտնազերծումների, դրանք իրականացնում էին բակտերիալ ու վիրուսային ուսումնասիրություններ, որոնք կարող են չղջիկներից մարդկանց փոխանցել ժանտախտի, լեպտոսպիրոզի, բրուցելոզի, այդ թվում և կորոնավիրուսների ու ֆիլովիրուսների հարուցիչները։ Ինֆորմացիա փոխանցվեց նաև ուսումնասիրությունների արդյունքում գենային մակարդակով գենոֆոնդի վրա ներազդելու հնարավորության մասին:

Ռուսական կողմի փոխանցմամբ՝ նմանատիպ լաբորատորիաներ են ստեղծված ինչպես նախկին ԽՍՀՄ-ը կազմած, այնպես էլ այն գոտևորած գրեթե բոլոր երկրներում։ Լրատվության համաձայն՝ անմասն չի մնացել և Հայաստանը, որտեղ դրանք 12-ն են (3-ը՝ Երևանում):

Չնայած փաստի հանրայնացմանը՝ այդպես էլ լռության մատնվեց, թե այդ կառույցներն ինչ փորձարկումներով են զբաղված մեզանում, այդ փորձարկումներն ի՛նչ ազդեցություն կարող են ունենալ մեր գենոֆոնդի վրա: Ասել է թե՝ արհամարհվեց ժողովրդի հստակ տեղեկացված լինելու իրավունքը։ Մինչդեռ, հարցն առավել քան կենսական կարևորության է, երկրի անվտանգային ու ազգի գոյաբանական խնդիրներին է վերաբերում:

Ժամանակը համոզիչ ապացուցեց, որ ՀՀ ազգային ժողովում 1999 թվականի հոկտեմբերի 27-ի սպանդի նախապատրաստված լինելու մասին առնվազն բարձրագույն ղեկավարության մակարդակով իրազեկված են եղել պատկան մարմինները: Այլ հարց է, որ չեն հավատացել դրա իրականացման հնարավորությանը, ինչը, սակայն, ոչ մի կերպ չի նշանակում խուսանավում, ազատում պատասխանատվությունից:

Հայաստանում ամերիկյան լաբորատորիաների լինելու փաստը ֆիքսված է: Եթե դրանք անվնաս մակարդակով իրականացվող հետազոտություններ են, հանգիստ կարելի է բարձրաձայնել ու հանրության միջից հանել կասկածի որոմը, իսկ եթե՝ ոչ, ու գիտակցված լռություն է պահպանվում այդ մասին, միանշանակ մենք կանգնած ենք հերթական ՀՈԿՏԵՄԲԵՐԻ 27-ի առաջ, գործ ունենք հերթական պետական դավաճանության հետ: