Հայաստանն ու Արգենտինան ավելի մոտ

«Արմենպրես»-ն ու ՏԵԼԱՄ-ը ստորագրել են համագործակցության համաձայնագիր:

Հայաստանի «Արմենպրես» պետական լրատվական գործակալությունը և Արգենտինայի ազգային ՏԵԼԱՄ լրատվական գործակալությունը երկու երկրների հումանիտար-տեղեկատվական կապերի ամրապնդման նոր հիմք են ստեղծել՝ ստորագրելով համագործակցության համաձայնագիր:


Փաստաթղթի ստորագրումը կայացել է Բուենոս Այրեսում՝ ՏԵԼԱՄ-ի կենտրոնակայանում: Արգենտինական գործակալության ղեկավարությունը մայիսի 23-ին հյուրընկալել է Արգենտինայում ՀՀ արտակարգ և լիազոր դեսպան Հովհաննես Վիրաբյանին, ում գործուն ջանքերով կյանքի է կոչվել համագործակցության համաձայնագրի ստորագրումը, «Արմենպրես»-ի տնօրեն Նարինե Նազարյանին և դեսպանության իրավախորհրդատու Վիոլետա Առաքելյանին:


Փաստաթուղթը ստորագրել են Նարինե Նազարյանը և ՏԵԼԱՄ-ի նախագահ Բերնարդա Յորենտեն: Համաձայնագրով կողմերը նախատեսում են իրականացնել համատեղ ծրագրեր՝ ուղղված տեղեկատվական դաշտի զարգացմանը, մշակույթի, հումանիտար, տնտեսական, սպորտի բնագավառներում և քաղաքական հարցերով օբյեկտիվ ու մասնագիտական լրատվական գործունեության խրախուսմանը, տեղեկատվական հոսքերի ամրապնդմանը և երկու ժողովուրդների մերձեցմանը։ Կողմերը կօգտագործեն իրենց կուտակած փորձառությունը տարբեր ծրագրերի համատեղ իրականացումը հաջող իրագործելու համար։


«Արմենպրես»-ի տնօրենը և ՏԵԼԱՄ-ի նախագահը քննարկել են լրատվական գործակալությունների աշխատանքում թվային տեխնոլոգիաների կիրառման անհրաժեշտությունը, ժամանակակից մարտահրավերներին ընդառաջ նոր լուծումների ներդրման հրամայականը, երկուստեք ներկայացրել են լուրերի և լուսանկարների արխիվացման, բազմաժանր լրահոսի ապահովման սեփական փորձը:


«Արմենպրես»-ն արդեն 103 տարի Հայաստանի կողքին է՝ Առաջին հանրապետության տարեկիցն ու նրա պատմության վավերագրողը: Հայաստանի պետական լրատվական գործակալությունը միջազգային չորս լրատվական կազմակերպությունների անդամ է, համագործակցության փաստաթղթեր ունի աշխարհի 20 պետությունների լրատվական գործակալությունների հետ և իր փորձն ու հնարավորությունները կներդնի Լատինական Ամերիկայի տարածաշրջանը հայ ընթերցողին ավելի մոտեցնելու և ճանաչելի դարձնելու հարցում: Այդուհանդերձ, պետք է նշեմ, որ Հայաստանն ու Արգենտինան միմյանցից հեռու են միայն աշխարհագրորեն. մեր ժողովուրդների սրտերը շատ մոտ են: Մենք փոխադարձ հետաքրքրություն ունեցող շատ ոլորտներ ունենք, որոնք պետք է վեր հանենք ու ներկայացնենք մեր ընթերցողներին նաև այսօրվա փաստաթղթով հիմք դրված համագործակցությամբ»,- նշել է Նարինե Նազարյանը՝ ուրախությամբ տեղեկացնելով, որ «Արմենպրես»-ի հինգ օտար լեզուներին (անգլերեն, ռուսերեն, արաբերեն, ֆրանսերեն, թուրքերեն) ավելանալու է ևս մեկը՝ իսպաներենը. կայքի իսպաներեն բաժնի շնորհանդեսը նախատեսված է մայիսի 24-ին Արգենտինայում ՀՀ դեսպանությունում:


«Համաձայնագրի ստորագրումը մենք համարում ենք կարևոր և ռազմավարական քայլ, քանի որ Արգենտինան և Հայաստանն ամուր պատմական կապեր ունեն, և բարձր ենք գնահատում հայկական մեծ համայնքի դերը մեր երկրում», - ասել է Յորենտեն։ Նա համոզված է՝ լրատվական գործակալությունները խնդիր ունեն «ավարտելու իրենց թվայնացման գործընթացը և խոսելու այս դարաշրջանի լեզվով»: «Դրան զուգահեռ և ի լրումն այն առաքելության, որն իրականացնում է ՏԵԼԱՄ-ը 76 տարի, թվային դարաշրջանին հարմարվող գործակալությունը նոր հնարավորություններ է ստեղծում ընթերցողների հետ ուղիղ երկխոսության համար»,-ընդգծել է Յորենտեն:


«Արմենպրես»-ի տնօրենը շրջայց է կատարել ՏԵԼԱՄ-ի երեք մասնաշենքերում, ծանոթացել թվայնացման և արխիվացման ծառայություններին, վերանորոգման փուլում գտնվող ստուդիաների ձևավորման մոտեցումներին, ինչպես նաև ընթերցողների հետ ուղիղ կապի ստեղծման նպատակով այցելուների կենտրոնի կառուցման աշխատանքին:

«Արմենպրես» լրատվական գործակալությունը հիմնադրվել Է 1918 թվականի դեկտեմբերի 18-ին, երբ Հայաստանի առաջին հանրապետության Ազգային Խորհրդի որոշմամբ ստեղծվեց նախադեպը չունեցող պետական լրատվական` Հայկական հեռագրական գործակալությունը: «Արմենպրես»-ի թիմը պահպանում է գործակալության առաջատար դերը հայաստանյան լրատվադաշտում և ամուր հիմքեր է ստեղծում տարածաշրջանային և միջազգային լրատվական հարթակներում՝ գործակալության ներկայությունն ապահովելու և զարգացնելու առումով: Գործակալությունը միջազգային մամուլում Հայաստանի ամենացիտվող լրատվամիջոցն է: «Արմենպրես»-ի լրատվությունից, բացի գործընկերներից, օգտվում են այնպիսի միջազգային հսկաներ, ինչպիսիք են CNN-ը, UPI-ը, «Սինխուա»-ն, BBC-ն, «ՌԻԱ նովոստի»-ն և այլն:


ՏԵԼԱՄ լրատվական գործակալությունը հիմնադրվել է 1945 թվականին: Այն ունի բազմաթիվ բաժանորդներ, թողարկում է տեքստային, ֆոտո-վիդեո-աուդիո արտադրանք՝ յուրաքնաչյուր օր հրապարակելով 500 տեղեկատվական նյութ: Գործակալությունը Լատինական Ամերիկայի վերաբերյալ ամենաընդգրկուն լրատվություն ապահովող մեդիա ռեսուրսն է:


Աղբյուր՝ Արմենպրես

SUMATE A NUESTRO CANAL DE TELEGRAM

RECIBÍ EL NEWSLETTER

Te escribimos correos una vez por semana para informarte sobre las noticias de la comunidad, Armenia

y el Cáucaso con contexto y análisis.

eNTRADAS MÁS RECIENTES

VOLVEMOS-05.png

NECESITAMOS TU APOYO
PARA HACER PERIODISMO DESDE EL PIE

Si llegaste hasta acá...

Es porque te interesa la información con análisis y contexto. NOR SEVAN tiene el compromiso desde hace más de 20 años de informar para la paz y cuenta con vos para renovarlo cada día.

Unite a NOR SEVAN

  • Instagram - Círculo Blanco
  • Facebook - círculo blanco
  • Twitter - círculo blanco
  • Telegram_X_2019_Logo-01
  • YouTube - círculo blanco