Փաշինյանը հրաժարվեց բարձրացնել նվազագույն աշխատավարձը

Արդեն 4 տարի է՝ հայ ժողովուրդն անհամբերությամբ է սպասում Փաշինյանի խոստացած երկնային մանանա:

Ռոբերտ Տեր-Հարությունյան, քաղաքագետ

Փաշինյանի կառավարությունը հունվարի 20-ի նիստում հավանություն չտվեց "նվազագույն աշխատավարձի մասին" օրենքում փոփոխությունների նախագծին, որով առաջարկվում էր այն 68.000-ից դարձնել 100 հազար դրամ։ Այսպիսով, Փաշինյանի տնտեսական քաղաքականության շնորհիվ Հայաստանում նվազագույն աշխատավարձը չի բարձրանա։

Այսպիսի ստորացուցիչ եղանակով Փաշինյանը ժողովրդին ցույց տվեց իր կախարդական փայտիկը: Հիշեցնենք, որ Փաշինյանը խոսք էր տվել հայ ժողովրդին, որ ամեն ինչ լավ է լինելու՝ աշխատավարձերն ու թոշակները կբարձրանան, ներդրումներ կգան, նոր աշխատատեղեր կբացվեն, հայրենադարձություն կսկսվի և այլն։ Փաշինյանը խորհրդարանի ամբիոնից հայտարարեց, որ կախարդական փայտիկ ունի, որը կլուծի ժողովրդի և երկրի բոլոր խնդիրները։ Արդեն 4 տարի է՝ հայ ժողովուրդն անհամբերությամբ է սպասում Փաշինյանի խոստացած երկնային մանանա, բայց ամեն անգամ հիասթափվում է և արտագաղթում:

Պետք է ասել, որ խնդիրն այն չէ, որ պետությունը փող չունի և դրա համար աշխատավարձ չի բարձրացնում։ Պետությունը փող ունի, քանի որ բյուջեի դեֆիցիտը ծածկվում է Արեւմտյան բանկերից վերցված վարկերով՝ դրանով իսկ մեծացնելով պետական պարտքը: Սակայն Հայաստանի իշխող խումբը՝ Փաշինյանի գլխավորությամբ, ներկայացնում է ոչ թե աշխատավոր ժողովրդի, այլ տեղական եւ միջազգային կապիտալի շահերը: Հենց այդ պատճառով էլ Փաշինյանի իշխանությունն անտեսում է բնակչության կարիքները և բյուջեի փողերը ծախսում են իրենց շահերից ելնելով։

Խնդիրն այն է, որ ցածր աշխատավարձի մակարդակը նկատվում է գաղութային եւ կախյալ երկրներում: Իսկ ինչպես հայտնի է, Հայաստանը, և Խորհրդային Միության շատ նախկին երկրներ վերածվել են Արևմուտքի կիսագաղութների։ Մի խոսքով, քանի դեռ Հայաստանը Արեւմուտքի կիսագաղութն է լինելու, ապա Հայաստանի աշխատավորները աշխատավարձ կստանան շատ ավելի ցածր, քան արեւմտյան առաջատար երկրներում։ Կապիտալիզմի տրամաբանությունը պարզ է, չի կարող կենսամակարդակը, աշխատավարձերը, կրթությունը, առողջապահությունը, կենսաթոշակները, կիսագաղութային երկրներում ավելի բարձր կամ հավասար լինել, ինչպես մետրոպոլիաներում։

Աշխատավարձի ոլորտում, ինչպես այլ ոլորտներում, Փաշինյանի քաղաքականությունը կառուցվում է այն պայմանների վրա, որոնք թելադրում է Արևմուտքը։ Քանի որ հենց Արևմուտքն է, իր կապիտալով ձևավորում Հայաստանում կապիտալիզմի զարգացման այն շրջանակները, որոնք նրանց պետք են:

-----

Սյունակում արտահայտված մտքերը պատկանում են հեղինակին եւ կարող են չհամընկնել «Նոր Սեւան»ի տեսակետներին: